بقلم نرمين عادل 2

المعلم توفيق الجبلي اتسجن بالسجن المؤبد عن جرائم القتل والتزوير..

وطارق أخذ 15 سنة سجن مشدد لمشاركته في التزوير والشروع في السرقة والإكراه..

والحاجة صفية وأولادها أخذوا أحكام متفاوته بالسجن والتجريد.

أما أنا.. فعدت لبيتي في المعادي.. البيت اللي ورثته عن فاطمة وعبد الحميد..

فتحت الباب الحديد الكبير.. المرة دي ما كانش فيه عربيات مركونة صف تاني، ولا ناس طمعانة جاية تقسم الأوض وتستبيح المكان.. الشارع كان هادي، وعم سيد البواب كان واقف على البوابة بيسقي الجنينة وهو مبتسم ابتسامة صافية..

دخلت الجنينة، وريحة الفل وشجر الجوافة ملأت المكان.. مشيت بثبات، وركبت السلم، وفتحت أوضة النوم الرئيسية اللي كانت حماتي بتحلم تأخذها..

قعدت على السرير، وطلعت الملف البيج اللي فيه عقود الملكية الحقيقية المسجلة، وحطيت جنبه السلسلة النحاس والمفتاح الفضي..

افتكرت كلام أمي فاطمة الأخير في وصيتها:

«يا بنتي، أول ما الناس تعرف إن تحت إيدك حاجة أو حيلتك قرشين، مش هيستأذنوكي قبل ما يمدوا إيديهم وياخدوها.. هيجربوا الأول يشوفوا هنسكتي لحد فين، ولو سكتِ.. بكرة ياكلوا لقتك!»

ابتسمت من قلبي وأنا بدمع، وقُلت وأنا بصادق روحها اللي حاسة بيها حوليا:

– «ما سكتش يا أمي.. وما خليتش حد ياكل لقتي.. عشت ووقفت على رجليا زي ما علمتيني.. وبيت فاطمة وعبد الحميد هيضل مفتوح بالخير والكرامة طول ما أنا حية.»

قفلت الملف، وقمت وقفت قدام مراية الأوضة.. شفت ندى الجديدة.. مش الممرضة الغلبانة اللي كانوا بيمشوها بكلمة، ولا الست الضعيفة اللي كانت بتخاف من كلمة طلاق.. شفت ست قوية، حرة، سيدة قرارها وبيتها، واللي خدت حقها وحق أصلها بالقانون والعزة.

النهاية